Përshtypjet e klientëve

dhjetor, 2009 

Cila është ndërtesa më e lartë në Prishtinë? - pyet guida jonë turistike, Leti - një vajzë bullgare simpatike që flet një shqipe aq të rrjedhshme e të pasur sa do të vinte në siklet dhe një gjuhëtar të Institutit Albanologjik. Pallati i shtypit,  87 m i lartë me 18 kate', më erdhi mua menjëherë në mendje, pasi e shoh çdo ditë rrugës për punë. Tani imagjinoni një ndërtesë sa 10 herë pallatin e shtypit me 160 kate. Shikoni në të majtë!, është ndërtesa më e lartë në botë, e famshmja "Burj Dubai" në qendër të Dubait, në rrugën Sheik Zayed. Ajo ngrihet 810 m drejt qiellit me vrull dhe duket si krijesë e ndonjë bote tjetër.

Kjo ndërtesë nuk është i vetmi rekord botëror i këtij qyteti, vazhdon më tej Leti duke na folur për mrekullitë e tjera të këtij qyteti që duket sikur ka dalë nga faqet e një strip-i të vizatuar me fantazi të shfrenuar të ndonjë artisti futurist. Këtu më tej ndodhet qendra komerciale më e madhe në botë "Dubai Mall" me sipërfaqe sa 50 fusha futbolli dhe me 1200 shitore të ndryshme me firma nga më të njohurat në botë. Gjithashtu, hoteli i famshëm "Burj Al Arab" i vetmi në botë me 7 yje. Më tej tregu i arit me unazën më të madhe në botë që peshon 83 kg, ar 24 karatësh, zbukuruar me nja 20 kg të tjerë gurë të cmuar. Dhe lista vazhdon e gjatë me rekorde botërore në qytetin e Dubait një nga 7 Emiratet e Federatës së Emirateve të Bashkuara Arabe. Pamja e Dubait, për dikë që mbërrin natën i përgjumur në qytet, është dicka e vështirë për t'u besuar si e vërtetë. Ai më tepër ngjan me një ëndërr a film fantastik ku grafika kompjuterike sfidon ligjet e fizikës. Veshja e punonjësve të sjellshëm të aeroportit të Dubait është veshja tradicionale arabe e bardhë dhe me shami në kokë e quajtur "Dishdashah" ose "Thoub". Eshtë njësoj - bën shaka një nga udhëtarët - sikur punonjësit e aeroportit të Prishtinës dhe doganierët të vishnin tirqe dhe plisa të bardhë në kokë ndërkohë që skanojnë retinën e syrit të udhëtarëve me pajisje të sofistikuara...

Hotelet e Dubait nuk janë të famshëm në botë vetëm për arkitekturën moderne dhe luksin që ofrojnë pa kursim. Ata janë të famshëm dhe për shërbimin e tyre të shkëlqyer qe e bën çdo vizitor të ndjehet sikur është ai vetë Emiri i Dubait. I  kudondodhur por shumë diskret, shërbimi ofrohet pikërisht atëherë kur nevojitet, pa të bezdisur, i përpiktë dhe shumë cilësor. Në një hotel të tillë vendosemi edhe ne, një natë dhjetori kur temperatura në qytet shënon 21 gradë celsius. Gjatë ditës, temperatura shkon në 30 gradë në këtë stinë të vitit. Një kohë e mrekullueshme për të bërë banjo dielli në plazhin pranë ose buzë pishinës së hotelit në tarracën e tij, pa menduar për të ftohtin dhe stuhitë e borës në Prishtinë. Fare pranë hotelit ndodhet një tjetër qendër komerciale,  "Burjuman" me mbi 300 shitore prestigjioze, e konsideruar si më e vjetra në një qytet që është vetëm 38 vjeç. Duket e pabesueshme por është e vërtetë. Dubai modern është ndërtuar në një kohë rekord prej vetëm 38 vitesh që prej vitit 1971 kur u themeluan Emiratet e Bashkuara. Në muzeun e qytetit ka shumë pak artifakte të periudhave të hershme historike, një kasolle tipike arabe, një varkë e vogël e druri dhe një pus që të kujton përpjekjet e vazhdueshme të banorëve të kësaj ane të botës për ujin e pijshëm. Ndryshe nga sa mund të mendohet, zhvillimi i Dubait nuk është varur vetëm në eksportin e naftës që aktualisht përbën vetëm një pjesë të vogël të të ardhurave kombëtare, jo më shumë se 6%. Dubai është zhvilluar për shkak të tregtisë, modelit të zonës së lirë nga taksat dhe së fundmi prej turizmit, tek i cili qyteti duket se po mbështet gjithnjë e më shumë rritjen e tij.

Në Dubai nuk ndjehesh kurrë i huaj. Vetëm 18% e popullsisë 2,6 milionshe të Dubait është autoktone. Pjesa tjetër është popullsi nga pjesa tjetër e Lindjes së Mesme dhe të Largët, nga Europa dhe Amerika. Kudo flitet anglisht, në shitore, në rrugë deri dhe në zyrat e shtetit. Koha kalon shumë shpejt në një qytet si Dubai, ku ka aq shumë për të bërë dhe për të parë. Shëtitjet e programuara nuk na ngopin, ndaj mbrëmjeve eksplorojmë në këmbë pjesë të ndryshme të qytetit që shtrihet në një sipërfaqe prej 4,000 km2. Taksitë dhe shërbimi urban janë fare të lira (çmimi i 1L naftë është vetëm 30 cent!) dhe shumë komode.

Gjelbërimi i qytetit është dicka tjetër që të bie në sy. Në Dubai bëhet një betejë e vazhdueshme për të shndërruar shkretëtirën në një vend të gjelbëruar. Thuhet se për cdo metër katror gjelbërim në Dubai shpenzohet rreth 10,000 USD në vit. Por shkretëtira nuk është i vetmi vend që po shndërrohet nga zhvillimi në Dubai. Ishulli gjigant artificial në formë palme i ndërtuar në det në Gjirin Persik është duke i shtuar rreth 520 km plazhe, shtëpi banimi, hotele dhe zyra të reja qytetit të Dubait. Por megjithatë forca dhe magjia e shkretëtirës ndjehet në Dubai. Mjafton të dilni nga qyteti me një nga paketat e shumta turistike safari, për të përjetuar emocionin që mund të provohet vetëm mes dunave të pafundme të rërës në kampet e Beduinëve rreth darkës me ushqime arabe dhe kërcime tradicionale. Qyteti përshkohet deri në thellësi nga kanali që vjen prej detit ku mund të udhëtohet me anije duke shijuar përveç darkës së pasur, edhe pamje të bukura të ndërtimeve të jashtëzakonshme të qytetit. Gjatë ditës, panorama e qytetit mund të shijohet edhe nga ajri, përmes ballonit ku mund të provoni një 'piknik' të pazakontë në 1500 m lartësi. Për të gjithë ata/ato që kanë pasion shopping-un, Dubai është qyteti i ëndrrave. Në çdo qendër komerciale të Dubait mund të shpenzoni një ditë sikur të ishte vetëm një orë dhe në fund të ditës të kuptoni se keni arritur të shihni vetëm një pjesë të katit të parë të qendrës. Dhe, dita mbyllet me një shfaqje të mrekullueshme të fontanave kërcimtare në dalje të "Dubai Mall" një shfaqje që ndiqet nga qindra kureshtarë e turistë çdo mbrëmje të javës...  

Aeroplani ngjitet me shpejtësi nga aeroporti i Dubait dhe ne nuk mund të heqim sytë nga dritaret e aeroplanit për të vjedhur edhe një shikim të fundit mbi këtë qytet të pasur që jo pa qëllim është quajtur "perla e Gjirit Persik" 

Një pesëshe me yll për Veneta Travel dhe partnerët e saj, për paketën e bukur dhe të veçantë në Dubai!

Ardian Lama

Menagjeri i Studios AFIDESIGN

Prishtinë